ملف اكل مصرى صميم: حتى المصريين ميعرفوهوش

window.google_render_ad();

الاكلة الاولى: المخروطة
اكلة تنتشر فى الوجه البحرى و القبلى ولكن باختلاف الاضافات
عبارة عن دقيق وماء وملح بسيط بدون مقادير حتى تتكون معك عجينة شبه عججينة السمبوسك وتفرد بالنشابة ثم تقطع بالسكين لشرائح طولية رفيعة شبه الاسباجتى ويفضل استعمال ماكينة اللازنيا نفردها فيها ثم نقطعها شرائح ثم فى حلة البخار نضع فى الجزء السفلى ماء يغلى و فى الجزء العلوى قطعة شاش ونضع شرائح العجين ونغلق عليها حتى تنضج بالبخار
للاكل : فى الوجه القبلى يسمونها المخروط فقط ويضيفون لها العسل الاسود
وفىالوجه البحرى اسمها مخروطة ويضاف لها سكر بودرة او عسل نحل يذوب فى لبن دافئ وممكن سمنة حسب الرغبة

الاكلة التانية: الحلبة الساقعة
طحن حبوب الحلبة حتى تصير بودرة ثم تستعمل كعصير التانك لعمل العصير تذوب فى ماء بارد مع السكر حسب الرغبة
وهو مشروب صعيدى صميم يستعمل للتغلب على حر الصعيد ويقال ان تاثيره اشد من اى مروحة او تكييف فى الترطيب يعنى تحس بعد ما تشربه انك واكل مكيف 2 حصان

طريقة عمل الشلولو:
دى اكله فرعونية صميمة ومشهورة قوى لدى الاخوة الاقباط خصوصا ايام الصيام
وهى عبارة عن

كوب ماء بارد

1 ليمونة

نصف بصلة (مقطعة قطع صغيرة)

6 فصوص ثوم (مفروم)

1 كوب ملوخية ناشفة

ملح حسب الطلب

توابل (شطة - كمون)
والطريقة
نضع الماء على النار ثم نضيي البصل و التوم ثم الملوخية مع التقليب ثم التوابل حسب الرغبة
ثم الليمون بقشره
وبعدين فى ناس بتحطها فى الخلاط مع رز مستوى وتضرب جيدا ثم تؤكل

ودى بقى طريقة تحضير المشبك سهل وبسيط

الصعوبه كلها فى القمع
المكونات
لكل مقياس دقيق
نصف مقياس نشا
اى
كيلو دقيق يضاف اليه نصف كيلو نشا + ملعقه كبيرة خميرة
ويتم عمل مستحلب مثل الكريمه السائله او الطحينه ( لاهو سائل ولا هو عجينه ) باضافه الماء
ويترك المخلوط ليتخمر لمدة ساعتين على الاقل
ثم يضع المخلوط فى القمع ممكن فى كيس الحلوانى بس خلى الفتحة صغيرة وممن بعبوة صابون غسل الاطباق بعد غسلها جيدا طبعا وتشكلى المشبك عند قليه فى الزيت المغلى
وفور النضج
يغمر فى شراب العسل مع مراعاة ان يكون القطر ثقيل جدا ويضاف له ماء الورد وملعقة سمنه "نص كوب ماء لكل كوب ونص سكر وملعقة فانيليا وماء ورد وملعقة سمنه
يمكن اضافه الوان متعددة للخليط قبل القلى
بس المشبك الاصلى مفيهوش الوان

ودى طريقة القلقاس بالسلق بمووووووووووت فيه

كل كيلو قلقاس حزمة سلق وحزمة كسبرة وقليل من التوم المفروم
سلق اللحم او البط يفضل دائما شوربة دسمة
تقشير القلقاس أقوم بمسحه بفوطة ناشفة افضل من غسله او غسله غسلة خفيفة ثم اضافته للشوربة مع اللحم ونتركه حتى ينضج
بقطيف الكسبرة والسلق ونخرطهم ثم نضع السمن فى طاسة وعليها الخضرة والثوم و نظل نقلب حتى نسمع صوت خشخشة يعنى الخضرة أصبحت ناشفة تماما وقل حجمها جدا ولا تحترق ثم نقوم بدقها فى الهاون ( طحنها جيدا ) ثم نضيفها على القلقاس قبل أن رفعه من على النار و ونتركه يغلى غلوة ونرفعه من على النار وبالهناء
القلقاس المسقعة
**************
الطريقة :
بعد تقشير ومسح القلقاس يقطع الى نصفان ثم ال شرائح (أقل من سمك البطاطس الصينية) بالعرض ثم نحمره فى سمن أو زيت نباتى ثم نحضر لحم عصاج ( مفروم خشن ومحمر مع البصل ) ثم نقوم بعمل الصلصة ونضعها على العصاج ونرص جزء من القلقاس فى صينية فرن بايركس أو فخار وعليها جزء من العصاج والصلصة وهكذا بالتبادل وأخر طبقة تكون من العصاج وعلى الوجه شرائح من الطماطم المقطعة ونضيف صلصة طماطم متبلة أو مرقة دجاج
المسقعة منقول بس بالخضرة انا بعرف اعمله

العيش الشمسى :
العيش الشمسي 'الملتوت' يصنع من دقيق القمح ويمر بست مراحل.ويتم عمل عجينة الخميرة في الليلة السابقة للخبيز حيث يتم وضع خميرة البرباسة في اناء صغير ويضاف كيلوجرام من الدقيق وكمية من الماء الدافيء ويتم العجن حتي تصبح العجينة سائلة ثم يغطي الاناء بغطاء محكم ويترك حتي صباح اليوم التالي. وفي الصباح تقوم سيدة عفية ذات مهارة بعملية العجين.
وتستغرق مرحلة العجين ساعة تقريبا وبعدها يتم تجريص 'تقريص' العجين اي تقطيعه الي قرص صغيرة وترص الدور 'جمع دورة' تحت اشعة الشمس حتي يتم التخمير ثم تقوم احدي الفتيات المشاركات في العجين بعملية التجريح بعملية التجريح بواسطة سلاعة 'شوكة نخيل' والتجريح هو عمل خط دائري حول قرص العجين وفي المنتصف يتم عمل الرقم 11 والخط الدائري هو معتقد فرعوني يرمز الي الاله 'رع' رمز قرص الشمس.
منقول

المكرونة باللبن "طبق حلو" من الوجه البحرى
مكرونه اقلام التى تستخدم فى طاجن المكرونة بالبشامل بتتسلق مع لبن وسكر وسمن لغاية ماتسيح ومعالم المكرونه تنتهى وتبقى وبعدين تتحط فى صينيه وطبعا فيها مكسرات وزبيب وبعدين يتحط على وش الصينيه سمن ..وتدخل الفرن..........

المــديــــــدة:
هى عبارة عن عشا رائع وسهل جدا بشرط توافر العيش الشمسى سبق شرحه
تجيبى العيش وتقطعيه قطع فى طبق عميق "مرة مكنش عندى عيش شمسى عملتها بتوست" بس مكنتش اصلى طبعا
وبعدين فى كنكة صغيرة نحط لبن مع دقيق مع ملح بسيط ونضعه على النار حتى يتماسك يبقى شبه الكاسترد بس اخف شوية
وبعدين نحطه على العيش ونوزعه بالتساوى ثم نضيف كمون صحيح قليل منه على الوجه
وبالهنا و الشفا
ملحوظة متاكلوش كتير عشان هى تقيله

طريقة عمل الثخينة:
اولا نجيب الرقاق عارفينه طبعا ونكسره قطع كبيرة نسبيا فى طبق عميق ونسخن الشوربة ونضيف بالملعقة بعض الشوربه على الرقاق حتى يتشرب ويلين بس مش كتير
لاننا هنجيب بعد كدة عصاج " لحمة مفرومة مع بصل مفروم " معروف طبعا ونحطه على النار مع شوربه برضه ونتركه يغلى ثم نضيف اللحمة بباقى الشوربة على الرقاق
ونحمر لحمه " قطع" بالسمنة البلدى ونضعها على الوجه
كلها لحوم؟؟؟؟طبعا " لانها اكله صعايدة" وعلى فكرة بتتاكل بالايد مش بالشوكة ولا المعلقة

الشعرية باللبن
وهى عبارة عن شعرية عادة نحمصها فى طاسة حتى تحمر ثم نضيف اليها اللبن تدريجيا يعنى شوية ولما تغلى نزود وهكذا حتى تستوى لان لو صبينا اللبن مرة واحدة هتتشربه وتعجن وهى المفروض تبقى شبه الشوربة وبعدين نزودها ملح حسب الرغبة
وطعمها تحففففففففففه...
وفى اكله كمان بالشعريه هى
الشعرية بالسكر:
نسلق الشعريه فى ماء عادى حتى تنضج وتشرب مائها ثم نضيف لها السكر وناكلها بالهنا و الشفا

البامية:
اولا بامية بالصلصة معروفة طبعا "تسبيكة اللى هى بصل محمر مضاف له طماطم معصورة وبعدين تترك على النار حتى تتسبك ثم نضع فيها البامية وافضل طعم ليها لما بتتزود لحمة ضانى وشوربة ضانى وتتحط فى طاجن فخار وتغطى وشها بورقة فويل وسيبيها تستوى فى الفرن براحتها وبالهنا و الشفا
المفروكة او الويكا:
بامية خضرا نقطعها قطع ونحطها فى الشوربة مع فصين توم سليمين بدون تقطيع وقليل من الملح تترك على النار حتى تنهرس البامية او يعنى تستوى تماما وبعدين بالمفراك " وهو حاجة كدة خشب ذراع وفى اسفلها قطعه تشبه المروحة توضع فى الطعام ويتم لف او برم الذراع الخشبية للتقليب وممكن بمضرب سمى مضرب اليايى وهو مضرب حلزونى او حطيها فى الخلاط وريحى دماغك حتى تختفى قطع الباميا تماما وبعدين صبيها فى طبق وصبى عليها باقى سمن تحمير اللحم على الوجه
الباميا الناشفة:
باميه مجففة وبعدين نطحنها حتى تصير بودرة وبعدين تتعمل زى الملوخية الناشفة بالظبط لكن بدون طماطم يعنى نحمر توم وبعدين نحط البامية قليل جدا لانها بتتقل بسرعة وبعدين نحط عليها الشوربة و الملح ونقلب وتغلى غلوة واحدة فقط

البصارة او بيصارو "بالفرعونى"
ربع كيلو فول جاف بدون قشره
ربطتين كزبرة خضراء
بصلة متوسطة
عدد من فصوص الثوم حسب الرغبة
قليل من النعناع الجاف
ملح و فلفل حسب الذوق
- للتقلية عدد من فصوص الثوم مع كزبرة جافة او بصل

الطريقة:

- ينظف الفول و يضاف كمية من الماء كافية لسلقه , تضاف الكزبرة الخضراء و النعناع الجاف و البصلة و الثوم , يجب عدم وضع اى ملعقة اثناء تسوية الخليط لكى ينضج الفول و ندعه حتى يستوي تماماً .
- بعد تمام النضج , ندع المزيج يبرد قليلاً ثم يخلط بالخلاط .
- يعاد الخليط للنار قليلا و يتبل بالملح و الفلفل حسب الذوق .
- تتم عمل التقلية بالثوم و الكزبرة الجافة المدقوقين جيدا و يحمر فى القليل من الزيت و السمن ثم يزين بها وجه الطبق او يتم عمل بصل محمر "شبه المستعمل فى الكشرى " وهو الافضل و تقدم .

طاجن عكاوى
نشترى العكاوى وهى "ديل البقرة او الجاموسة" وعشان كدة بتبقى عبارة عن فقرات عظمية
نخليها نخلى العظم عن اللحم نسلق العظم عشان الشوربة واللحم نحمره مع بصل واى خضار تفضليه وبعدين شوية شوربة عكاوى السابق عملها وطماطم وصلصة طماطم وندخله الفرن وبالهنا و الشف

الخبيزة على الطريقة المصرية
المقادير:
1/2 كيلو خبيزة
حزمة سلق
حزمة شبت
حزمة كسبرة
نص وعاء شوربة لحم
ربع كوب أرز
2 بصلة كبيرة
4 ملاعق كبيرة سمن
رأس توم مدقوقة

الطريقة:
يغسل الشبت والكسبرة ويقطع إلى قطع رفيعة جدا بالسكين ثم نضعهم على الشوربة على نار متوسطة.
نغسل الأرز واضعه ليسلق مع الشوربة.
تنظف الخبيزة جيدا (تقطف الزهرة (وتغسل وتُصفى ثم تُخرط مع السلق، أو نضعها على النار لتسلق مع السلق ثم نضربهم في الخلاط.
خذي الخليط وضعيه على الشوربة وبعد غلوتين وبعد أن نجد الخليط قد أصبح سميكا بعض الشيء نطفي النار.

الطشة:
نقشر البصل ونبشره بالمبشرة ونضعهم مع السمن في وعاء على نار متوسطة لتحمر.
بعد أن يصفر لونه ضعي عليهم رأس التوم المدقوقة
بعد أن يحمر الثوم ضعي عليهم الخبيزة (الخليط الذي تم صنعه سابقا)
ثم أقلب وأطفي

بالنسبة للكشك
وهومن الأطباق التركية المحبوبة لدى المصريين ، وهو سهل الإعداد والتحضير ومفيد فى نفس الوقت لإحتوائه على اللبن والدقيق .

المقادير :
- 2 كوب شوربة ( فراخ – بط – أوز ) مضاف لها ملح وفلفل .
- 3 ملعقة دقيق .
- كوب كبير لبن .
- بصلة متوسطة .
- 2 ملعقة أرز.

الطريقة :
- ترفع الشوربة على النار وبعد غليانها يضاف الارز بعد غسيله .
- يخفق اللبن مع الدقيق جيداً ثم يضافوا على الشوربة بعد نضج الأرز ويقلب .
- يستمر التقليب حتى يصبح القوام مناسباً .
- ثم يصب فى أطباق ويستخدم البصل المحمر للتجميل .
انا عاوزاكى بقى يا جميل تركزى مع مامتك فى وصفة الخبيزا لانى مش لاقيه حد يعرفها خااااااااااالص

كفتة الارز :
لحمة مفرومة مع رز مصرى مغسول مع بقدونس وتوم وبصل وتوابل "ملح وفلفل اسمر وكمون"
وتطحن مع بعضها
وبعدين تتعمل صوابع وتتحمر فىالزيت و بعدين " انا شخصيا باكلها كدة وهى سخنة " هههههه
بس المفروض تتحط فى صلصة توم "توم محمر نحط عليه عصير طماطم حتى يتسبك" وفى ناس بتحب تحط معاها بطاطس مقطعة مكعبات وعلى فكرة دايما بتتعمل فى الافراح معرفش ليه
وتتاكل جنب الرز حبة وحبة وهو بالمناسبة نجيب شوية رز ونحمرهم حتى يتحولو للون الذهبى وبعدين نحط باقى الرز ونقلب ونزود الملح وبعدين الشوربة وهكذا الى اخر طريقة الرز العادى
نرجع للكفته
انا بقى بعملها بطريقة تانية اخف من الصلصة
نجيب بصل ونحمره حتى يصفر فقط وبعدين نحط الكفته ونقلبها مع البصل ونزودها قليل جدا من الماء " يعنى نفس طريقةالكباب حلة" وناكلها جنب مكرونة بتطلع حلوة جدا جدا جدا

الكوارع:
بصى يا نانسى تشتريها من عند الجزار سهلة دى وبعدين تنضفيها لو فيها شعر بانك تعرضيها للنار عشان الشعر يطير
لو نضيفة
يبقى تغلى شوية مية وتسخنيها مش تغليها وتحطى فيها الكوارع وبعدين تشيليها بسرعة عشان تتخلص من الزفارة
وبعدين تحطيها فى ماء مغلى مع بصل وورق لورى و مستكة وجزر مقطع فلفل اسمر
وبالهنا و الشفا
وانا اكلتها مرة عند العهد الجديد فى الحسين "عارفاه طبعا" كان مقطع اللحم اللى فيها بعيد عن العظم وعامله قطع صغيرة جوه الشوربة بس بصراحة هى احلى حاجةفيها النخاع والجو نفسه وانتى بتخبطى العضم وتطلعيه

السبانخ بالصلصة:
اولا نعمل الصلصة " التسبيكة" بصل مفروم نحمره وبعدين نضيف له طماطم معصورة و ملح وتوابل ونتركه على النار حتى تتماسك ثم نضيف السبانخ " بعد تنضيفها وتقطيعها طبعا" وشوربة لحم وممكن نضع اللحم ايضا بها وبعدين نتركها حتى يذبل ورق السبانخ فى الصلصة ثم نحمر قليل من الارز المصرى " واحيانا يستعمل الفريك" فى طاسة حتى يتحول للون الذهبى ثم نضيفه للسبانح ونضيف الملح و التوابل حسب الرغبة ولكن للعلم السبانخ لا تحتاج لكثير من الملح لانها تحتوى على املاح ويكون علامة نضجها هو نضج الارز الموجود بها وتؤكل مع ارز محمر "حبة وحبة"
احيانا فى الصعيد يتم طبخ السبانخ خضرا بدون صلصه حمرا
وذلك بوضع السبانخ فى الشوربة حتى تذبل "دون صلصة" ثم الارز المحمر وباقى الخطوات عادى

الارز المعمر
فهو ببساطة رز باللبن و القشطة بيتحط فى الفرن
تجيبى رز الكمية اللى تحبيها وضعفها لبن يعنى كوب الرز عليه كوبين لبن وتحطيهم مع بعض يعنى تنقعى الرز فى اللبن وبعدين تحطيه على النار حاجة بسيطة وبعدين تنقليه ضرورى لطاجن فخار ووممكن تزودى لبن تانى لو كان الرز مش متغطى لبن ومفيش فيه ملح خالص لانه بيبقى مسكر شوية لكن ممكن مستكة وحبهان لو تحبى وتحطى عليه ضرورى معلقة قشطة ومعلقة سمنة بلدى وتحطيهم فى الفرن لحد ما يستوى الرز ووشه يحمر
ويمكن الفراخ بتتعمل جنب الرز لان ملهاش علاقة رسمية بيه

فول بطماطم
المقادير
كمية فول مدمس تكفي لأربع أفراد
1 طماطم كبيرة
1 فلفل رومي كبيرة
2 ملعقة طعام طحينة
ربع ملعقة صغيرة شطة
ملعقة صغيرة ملح
ملعقة صغيرة خل
1 سن ثوم
زيت حسب الرغبة
قليل من الماء
الطريقة
1. يفرغ الفول في إناء الطهو ثم نقوم بتقطيع الطماطم والفلفل إلى قطع صغيرة عليه.
2. نضيف القليل من الماء والزيت حسب الرغبة.
3. نقطع سن الثوم إلى نصفين ونضفيهم ونضع الخل والملح والشطة وملعقة الطحينة ونقوم بتقليب جميع المحتويات على نار هادئة من 5 إلى 10 دقائق.
وساعات فى ناس بتضيفله بسطرمة

حمص الشام " الحلبسة"
ربع كيلو حمص
بصلة صغيرة
اربع فصوص ثوم
ملح وكمون
لمون
طماطماية
ننقع الحمص فى ماء ليلة كاملة
وتانى يوم نغسله من ماء النقع ونحطه فى دماسة الفول " او ممكن اى حلة " ونضيف ماء جديد ثم البصل مقطع لقطع صغيرة و التوم صحيح والطماطم معصورة والملح و الكمون وممكن زنجبيل بودرة "لانه مهم جدا فى الشتا"
ومعاهم عصير لمونة وممكن خل " بس انا بحط لمون بس" وبعدين نحطهم على النار حتى ينضج الحمص
يقدم فى اكواب زجاجية وممكن نضيفله شطه ولمون زيادة حسب الرغبة

البطاطا:
تغسل حبات البطاطا وتنظف من الطين وبعدين نجيب حلة ونحط فيها ورق ياريت بلاش ورق جرايد ويستحسن اى ورق تانى كرتون او كذا طبقة من الورق الابيض العادى ونرش ميه قليل على الورق بيحس يكون مبلول وبعدين نحط البطاطا وبعدين نحط برضه ورق تانى بحيث نغطى البطاطا تماما بالورق وبرضه نرش عليه ميه قليله ونحطها على نار هادية وكل شوية نفتح لو لقينا الميه نشفت نرش مية قليل تانى... لاتغرقيها بالماء وفى نفس الوقت لا تتركيها حتى تنشف ويحترق الورق تابعى العملية حتى تنضج البطاطا ولا تتعجلى نضجها اتركيها على نار هادئة مع اضافة الماء بالتدريج
البطاطا المشوية: نغسل البطاطا وبعدين نحطها فى الفرن بسيطة جدا " بس المسلوقة بالورق احلى كتير
وبعد ان تنضج البطاطا باى من الطريقتين نفتحها ونرش عليها سكر
او فى بعض الناس بتحبها حادقة وبترش عليها ملح

الكرشة والممبار
اهم شئ التنظيف ثم التظيف ثم التنظيف وقبل التنضيف تجيبيها من جزار تعرفيه كويس
لازم اولا يتنظفو كويس انا شخصيا اى حاجة لونها مش ابيض بشيلها هههههه
الكرشة:
تتنظف ثم تتنضف وبعدين ندعكها بلمون وملح وخل ونشطفها كويس
وبعدين نحطها فى حلة وحليها بصل وتوم وملح وتوابل وصلصة طماطم وعصير طماطم ونسيبها على النار لغاية ما هى تنزل الميه بتاعتها الافضل تقلبى البصل و بعدين التوم وبعدين الكرشة تقلبيها معاهم على النار شوية وبعدين زودى الطماطم وسيبيها شوية وبعدين زودى ميه حسب الحاجة
بس اقول لكم الصراحة انا مبعملهاش
مش بقرف بس بيتهيالى انها ملهاش اى قيمة غذائية لانها لا لحم ولا عظم وانما جلد يعنى اكيد مفيهاش اى بروتين او عناصر غذائية
الممبار بقى بموووووووت فيه
بس برضه اشتريه من حد تعرفيه " بيتهيالى كل الناس فى مصر كل عيله ليها الجزار اللى بتثق فيه"
وبعدين اغسليه بمية واقلبيه وشيلى بالسكين بس برفق عشان ميتقطعش اى شئ جواه "الجزء الاصفر" وادعكيه طبعا بلمون وملح وخليه فى اللمون شوية
وبعدين قطعيه حسب ما تحبي انا بحب اعمله قطع صغيرة عشان تتاكل على طول او ممكن تعمليه قطع كبيرة وتقطعيه عند التقديم
وتجيبى الخلطة فى ناس بتستعمل خلطة المحشى العادية "رز وصلصة و بقدونس "
بس انا بحب اعمله برز وبعدين نص الطماطم عصير والنص التانى مقطع قطع صغيرة جدا جدا وطبعا بقدونس وتوابل " كدة اخف لانه هيتقلى كمان مش يبقى مقلى ومسبك مع بعض كتير ههههه"
وبعدين تفتحتى الممبار وتحشيه ثبتى طرف من الممبار على الصينية اللى فيها الرز وامسكى الطرف التانى بايديكى الاتنين وافتحيه وبعدين دخللى الرز باطراف اصابعك
لا تحشيه للاخر واتركى مسافة لنضج الارز
وبعدين تحطى ميه على النار تغلى وتحطى فيها الممبار واحدة واحدة ووطى النار حتى لا ينفجر و هتلاقيه انكمش وبعدين لما اتحسى الرز نضج ممكن تختبريه بسكين بس كونى حريصة جدا
وبعد النضج طلعيه فى مصفاه ثم حمريه فى الزيت وبالهنا و الشفا

طريقة خاصة جدا جدا للمحشى
وهى تحطى الرز وعليه التسبيكة و الملح و التوابل اللى تحبيها وبقدونس وشبت وبعدين تحطى الخلطة دى على النار وتزوديها مية قليل " شبه طريقة تسوية رز الحشو للحمام" وتسوى الرز نص سواء وبعد مايرد
تاخديه وتحشى سواء البادنجان او الفلفل او الكرنب او الكوسة " بس الورق عنب " مش ينفع بالطريقة دى وبعدين تحطيه فى صينية فرن وتزودى مية قليل تقريبا نص كمية المية اللى بتحطيها على المحشى بالطريقةالعادية
وتدخليه الفرن وتغطيه بورقه فويل حتى ينضح "حوالى تلت ساعة" وبعدين تشيلىالفويل وتفتحى الشواية عليه لحد ما يحمر وجه المحشى ...... طعمه تحفففففففففه وشكل الصينية على السفرة يفتح النفس
بس طبعا تصلح لكمية محشى قليلة يعنى لو هتعمليه طبق جانبى فى عزومة مثلا

البسيسه
هى فكرتها قائمة على خلط زيت مع سمن وخلط دقيق قمح مع دقيق ذرة،
والسمنه ضعف الزيت ودقيق القمح ضعف دقيق الذرة
وحلوة جداجدا مع الشاى بلبن
المقادير
1 و1/2 كوب سكر 4 بيضات 1/2 كوب سمن أو زبد 1/4 كوب زيت 2 ملعقة بيكنج باودر 1/4 ملعقة كربونات الصودا 2 كوب دقيق 1 كوب دقيق ذرة 2 كوب زبادي ملعقة فانيليا سمسم للوجه
الطريقة
يضرب البيض والسكر والفانيليا في الخلاط (الخاص بالعصائر). .1ثم يضاف الزبد والزيت ويستمر بالضرب. .2ثم يضاف الزبادي ويستمر بالضرب. .3ينخل الدقيق والبودر والكربوناته ودقيق الذرة ويضاف للخليط السابق ويستمر بالضرب. .4ندهن صينيتين بالزبد وتصب البسيسة بحيث يكون ارتفاعها 2 سم وترش بالسمسم على الوجه وتدخل فرن متوسط الحرارة لمدة 15 – 20 دقيقة حتى تنضج ويحمر الوجه. .

طريقة عمل القرنبيط المقلى:
نقطع زهور القرنبيط
ونسلقه فى ماء ساخن نصف سلق
وبعدين نحضر الخلطة اللى هى " لبن ، بيضه، ملعقتين دقيق، ملح ، توابل، بقدونس " ونضع القرنبيط فى الخلطة ثم نقليه فى زيت حاااااار وعميق
وممكن عمل نفس الخلطة للبطاطس
وممكن عمل القرنبيط فى الفرن نحط القرنبيط بعد سلقه فى صينية ثم نضع نفس الخلطة فوقه وندخله الفرن بس المقلى افضل طبعا فى الطعم

صينية الرقاق الطرى باللحمة المفرومه
اولا نجيب الرقاق
ونبلله بالشوربة جيدا ثم نضعه على قماشة كل رقاقه لوحدها حتى يجف
وبعدين نفرده فى الصينية نضع عدد من الرقاقات على بعضها ونحط العصاج " بصل نحمره وعليه لحمة مفرومة و قليل من الصلصة و بقدونس مفروم" وبعدين نحط باقى الرقاق
نصب بعض الشوربة على الرقاق لكن قليييييييييل جدا نوزعها جيدا على الرقاق
ونضعه فى الفرن او نضعه على البوتجاز مع التحريك المستمر للصينية ثم قلبها انا بفضل الفرن اسهل لكن ناس كتيير بتقول البوتجاز افضل
وبعد ما يحمر الرقاق نخرجه من الفرن
انا باكله عند المرحلة دى لكن محتاجاها اطرى ممكن بعد ما يبرد " مش وهو سخن عشان ما يعجنش" نصب عليه بعض الشوربة قليييييييييل جدا برضه كانك بتصبى قطر او شربات على بسبوسة توزعيه على الصينية وخط خفيف من الشوربة

طبق الكبده بالدمعه
المقادير
نصف كجم كبده - نصف كجم طماطم _قليل من الشطه _عصير بصله _ربع راس ثوم مفري - عصير ليمونه -م خل
قليل من الماء -ملح وفلفل -زيت للتحمير
الطريقه
1 -يغسل الكبده ثم تقطع شرائح متوسطة الحجم ويتبل بالملح والفلفل وعصير الليمون والبصل وتترك نصف ساعه
2- تغطى بالدقيق وتحمر في الزيت وترفع ويحمر الثوم مكانها ثم نضيف له عصير الطماطم وتترك على النار تتسبك قليلا ويضاف الخل وقليل من الماء وتتبل
3- تقطع شرائح الكبده المقليه لشرائح اصغر او تترك كما هي وتضاف للصلصه السابقه وتترك بها 10 دقائق حتى تغلي
وتغرف وتجمل بالبقدونس وتقدم ساخنه

كفتة الجمبري
المقادير
1كجم جمبري -نصف فنجان ارز مطحون -2بيضه - م عصير ليمون -م كبيره بقسماط - م بقدونس مفري
1 م دقيق - 1م شبت مفري - 4 فص توم مفروم - كرفس - ملح وفلفل وكمون

الطريقه
1- يغسل الجمبري ويقشر وتنزع سلسلة الظهر والراس والديل ثم يغسل جيدا ويسلق
2- يفرم في المفرمه
3- يخلط الجمبري بالارز المطحون والثوم المفروم والبقدونس والشبت ويتبل بالملح والفلفل والكمون وعصير الليمون ويخلط جيدا
4-تشكل اصابع او دوائر وتقلب في الدقيق ثم البيض المتبل ثم ترش بالبقسماط وتحمر
وتقدم مع السلاطه الخضراء

البليلة " ومتفرع منها العاشوراء"
سهلة قوى وكلكم عارفينها انا بس حبيت اذكرها عشان يبقى الملف متكامل
قمح " غله" زى ما بنسميه فى مصر
يغسل وينقع من بالبليل وتانى يوم
نغليه ع النار لحد ما يستوى
وبعدين عند التقديم نضيف لبن و سكر حسب الحاجة
والعاشوراء هى هى البليلة بس بنجيب نشا وندوبه فى لبن ونضيفه عليها لحد ما تتماسك وتزين بالمكسرات حسب الرغبة

بـــــــــــــــــس خلاص
عاوزة اشوف الردود بقى

*البرنسيسة*